Hebrews 10

Kalisito Mu'italonu Maulixu Alaxu Vilesisi

1Lapuloto noxou Mosesi tei ne anu tovola'i sou mii ma'ia lailaixe sou uxali ili'isi. Ia anu mii maninasou uasi. Xo no anu lapuloto la ine'enu mii iouvilesisi utotomu no anu tauu ie vilesisi sou i'elaxu ulai noxou Lataua lalalaxu. Ia no anu vote'i ane ne umomomo sou u'oxone'i ta mitema e mine'e milotu ne ixali malemalenga vile uasi. 2Ia lexe ane'i ine'enu mimii sou i'elaxu ulai noxou Lataua xe mixamuline'i lexe ane'i mixali laixe mukalu, la umomomo sou ine'e i'oxonu lalalaxu la uasi. Xo ane'i mi'oxonu alaxu vilesisi ne, anu mumomomo. 3Ia uasi, ane'i i'elaxa'a ta mimii ulai noxou Lataua utotomu no anu tauu ie vilevilesi, la sou anu u'oxone'i ixavutalanu susu noxi'a la. 4 ^aXo sialuxa'a ta bulumakau ta mulu xe ta xoutu umomomo sou ukalusou susu avile uasi manina.

5 ^bAloxo ne la sou no mine Kalisito sou une'e no lia 'o, la muvikalanu Lataua aloxo 'o,

“Nini namasaxau mo taneni utulu no anu mimii e ine'e ilosine
xe mimii i'elaxu ulai noxine uasi.
Ia nelalaxinusilo vasimelo vile sou axolu no anu.
6Mimii e ine'e i'elaxu no navu ulai noxine mo ane i'elaxu sou uxexeenu susu ne,
nini namasaxau kalumo uasi.
7La sou eni evikala aloxo 'o,
‘Lataua, eni ano 'o, sou amulinu masaxa noxine
loxo mikaukavunu vaikalasilo muai no anu Lavuku Tavuna.’”
8Tei la Anu muvikala no anu 'ilixo sou mimii i'elaxu mo ine'enu mimii noxine loxo nini na'anini mo i'elaxu sou uxexeenu susu, la nini namasaxau mo taneni utulu no anu uasi. Manina loxo ane'i mimulinu lapuloto sou mi'oxonu, ia nini namasaxau uasi. 9Xe ili'i la, la Anu muvikalanu Lataua aloxo 'o, “Eni a en'e 'o sou amulinu masaxa noxine.” La sou Lataua muxexeenu 'ilixo sou i'elaxa'a ta mimii tatei ia muxalixu ane alavua sou uno'u tanixu ane tatei. 10 ^cXo Iesu Kalisito mumulinu masaxa noxou Momu mo mu'italonu vasimolu alaxu vilesisi sou muxexeenu susu noxinge, la sou nenge texali ta mitema ta malemalenga manina.

11 ^dMo aloxo ta aili'i vilevilesi ilavusou i'oxo'oxonu utotomu sou i'oxonu xaixai noxi'a. Ane'i itutulu ixaxai sou i'elaxu mimii ulai noxou Lataua, lalalaaxu xe iouvilesisi. Ia umomomo sou uxexeenu susu uasisi manina. 12Ia noxou Kalisito la mu'italonu maulixu alaxu vilesisi mulai noxou Lataua sou uxexeenu susu. Mo mii ane ne anu umomomo sou ukalu uasi, uxolu utotomu. Anu mu'oxonu aloxo ne mukalu, la mutalupexa noxou Lataua pa'umolu no avolu tema. 13 ^eMo Anu a uxoxomaiou voxo ane sou umalaxo'a ta uluau no tava'u. 14Xo no anu mii e Kalisito mu'oxonu alaxu vilesisi mauli noxou Lataua ne, la mu'oxone'i ane'i ane ta na'u mi'isalili mixali malemalenga manina kaluxu uasi. 15Mo Uleenu Tavuna muvikalanengexu mii ne kalumo. Tei la Anu muvikala aloxo 'o,

16 ^f “Tila muvikala aloxo 'o,
‘Eni axalixu 'ilixo sou opo vilesisi
mo amomosou vaikala noxi'a no anu voxo ne aloxo 'o.
Eni amulaxu lapuloto noxilo no opone'i
xe akaukavunu uxolu no anu xavutalai'a.’
17 ^gXe mukalu la musolonu aloxo 'o,
‘Susu noxi'a mo 'ili'ilixo masumasua e mi'oxo'oxonu ne,
maasi la eni amomomo sou axavutalanu la uasi.’”
18La sou lexe Lataua tanu vulusiu susu ne la tane'enu mii vile la sou uxexeenu susu la uasi.

Tamuxaxu Tanenge Mo Tatulu Pekia'inge

19 ^hAloxo ne la sou ta vivilo noxou Iesu nenge telavusou manina lexe no anu sialuxu Iesusi la sou nenge tamomomo sou ta'unalai no anu Kaveutu ane Tavuna Manina. Ia ta'ume uasi. 20 ⁱNenge tamomomo sou ta'unalai no anu vote'i alavua e mauli no anu. Vote'i alavua ne Anu molu mukisiinu sou ta'unalai no anu. Ta'unalai la tapolo no anu lavalava tatila loxo aitenga. Xo lavalava ne anu musosovosou vasimolu. 21Mo nenge menge aili'i tatila a uxolu sou usaxila'a ta temanu tani noxou Lataua. 22 ^jLa sou laixe lexe nenge tamuxaxu tanenge maninasou mo talai 'alai noxou Lataua no anu opo laixe maninasou. Xo Anu mupeipeisinge no anu sialuxu sou mu'uiinu tanenge sou muxexeenu susu muxolu no anu mo mukalusou susu masumasua te'oxo'oxonu no anu xavutalamenge. Xe mu'uinu vasimenge no anu lexa ane malemalenga manina. 23Mo mii ma'ia nenge tepala'alixu lamana xe teloopala no anu, la anu laixe lexe nenge tatetelisou pekia'u, mo tamuxaxu tanenge no anu. Xo Anu ane musakiinu vaikalasou tei ne, uvikala la, u'oxonu maninasou vaikalau.

24Xe anu laixe lexe nenge taxavutalane'i ta menexinge. Mo takamuli vote'i sou ta tasu'uline'i mo taavutilixa'a no anu 'ilixo sou tane'ixa'a ngatongato'o xe imulinu 'ili'ilixo lailaixesi. 25 ^kLa sou anu laixe lexe nenge'a tatotosa no anu 'ilixo sou tapitapita mamu, loxo ane'i mose'i i'oxo'oxonu. Ia tapitapita utotomu la nenge tamomomo sou tapeletotosinge mo ta'oxonu pekia'inge ngatongato'o. Xo ngamaisou voxo noxou Tila sou ulivu une'e a 'ala'alai mukalu.

26 ^lMo lexe nenge teno'u lavulavusou vaikala e manina ia ili'i xe taxiunu tumalinge no anu mo tamulinu masaxa noxinge sou ta'oxonu sususi, la mii vile la ta'elaxu sou uxexeenu susu noxinge ne uasisi manina. 27 ^mIa ta'ume manina, mo taxomaiou voxo tila sou tatulu no anu vaivaikala noxou Lataua. Mo navu tatila a mulalaxii sou u'elaxa'a ta uluau Lataua. 28 ⁿMo nenge telavusou lapuloto noxou Mosesi muvikala tei aloxo 'o. Lexe itema vile umulinu lapuloto noxou Mosesi uasi xe ususu, ia ta mitema ta tamei xe tatalu milavusou xe ia'aloxu la itema ne umomomo sou tane'ixu mo imoxotalosou uasi, ivau usoli avile. 29 ^oLa sou ngingi ngexavutala a loxovaa noxou itema e umaapitasou Lataua 'Olu? Itema ne uno'u tu'umaxu tatila manina. Xo no anu sialuxu Kalisitosi la uxalixu opo vilesisi. La u'uinu itema ne la uxali loxo Lataua na'u mu'isalili. Ia itema ne u'oxonu sialu ne uxali loxo mii vitanisi manina, xe upupuiou Uleenu Tavuna sou alauna. 30 ^pNenge telavusou lexe Lataua muvikala aloxo 'o, “'Ilixo sou lakoli ne eni na'axeni, eni melo akolinu susu noxi'a.” Mo muvikala la aloxo 'o, “Tatila molu utulusi'a ta mitema noxou no anu vaivaikala.” 31Ae, manina misevile, lexe itema vile uxomaiou voxo sou Lataua e umauli utotomu ukolinu susu noxou, la anu u'ume xe tanu kalaua manina.

32Tangengi ulivu mo ngaxavutalanu voxo tatei no mine vaikala lamana noxou Lataua muxali noxinge. No anu voxo ane ne la tu'utu'umaxu ta tatila muxali noxinge mo ngetavulenu tu'utu'umaxu, ia ngingi ngetulu pekia'inge. 33Mo alaxu mose'i la mitulusinge no ie'i ta mitema tavu'alo la mito'oto'omenge no anu vaivaikala mose'i xe mixililiengi. Xe no mine mi'oxo masuane'i se'i la ngingi ngongi'a ngeno'u tu'umaxu mukei. 34 ^qMo no mine mimulaxa se'i noxinge no taasou navunavu la ngigni tangengixa'a la nge'oxo laixe noxi'a. Mo no mine mine'e mi'umenu mimemimengi la ngingi nge'osasi. Xo ngingi ngelavusou lexe mimii lailaixe noxinge maninasou e kaluxusou uasi a mulalaxii muaai.

35La sou lexe ngingi ngetulu pekia'inge mo ngaxolu se'isisi tei aloxo ne la mamu sou ngasu'anu 'ili'ilixo ane ne. Xo ili'i la ngano'u lakolisou lailaixe manina. 36Laixe lexe ngatulu pekia'inge aloxo ne. Mo sou lexe ngamulinu masaxa noxou Lataua laixe, la ngano'u mii ma'ia ane Anu musakiinu vaivaikalasou lexe ngingi ngano'u.

37 ^r “Xo maxuveeni uasi. Voxo sou Anu une'e a 'ala'alai mukalu.
La une'e ne. Mii vile utaluxu uasi, une'e ne upasipaasi.
38Ia anu ane mulapu no anu muxamuxaxu tanu noxou la anu uxolu,
ia anu ane usukusuku ulivu la eni a'osasou uasi.”
39Ia nenge ta mitema sou tasukusuku talivu mo ta ulua avile uasi. Nenge ta mitema sou temuxaxu tanenge mo ta mitema sou tano'u mauli.